Sauene får ein godbit i snøen

Sauer, snø og ungar

Det er ikkje så ofte at vi har både is og snø, som varer lenger enn tre dagar. Når vi fyrst får det er det ei fryd for alle. Vi har ungar og barnebarn på besøk – og har kosa oss saman på sjø og land. Laga snømann, aka, grilla og gott ein ekstra godbit til sauene.

Sauene beitar på lyngen no om vinteren. Når snøen kjem trekkjer dei heim til hus og fjøs, for då veit dei at her er det mat å hente. Vi har opna siloen og fôrar sauene inne i fjøsen. Straks dei har fått seg ein godbit går dei ut igjen på beite. Vêrane som går på eit beite for seg sjølve får fôret i ei fôrkorg der. Alle dyra våre har tilgang på husly, men dei føretrekkjer å vere ut – sjølv om det er snø i lufta.

God solsnu og god jul frå Reksta Villsau!

God solsnu og god jul

Vi har lagt bak oss ei travel tid med pakking og sal av spekepølser. Det har vore veldig kjekt! Bondens Butikk i Førde har vore ein god salskanal og førjulstida der folk treng nyttige gåver har vore nyttig for oss.

Det er utruleg kjekt og inspirerande å høyre at folk likar pølsene vi lagar og likar skinna frå sauene øg lamma våre. Det inspirerar oss til å gjere ein endå betre jobb 🙂

No ønskjer vi alle ein god solsnudag (vintersolkverv) og håpar at alle får ei triveleg jul med gode folk og god mat og drikke!

Julenissehelsing frå Lars Erik & Anita

Smaksprøving Bondens Butikk - Reksta villsau

Slowfood-dagen, med fart på pølsesalet

Villsau er slowfood - Reksta Villsau

Villsau er slowfood – Reksta Villsau

I dag er Terra Madre Day eller slowfood dagen – og dei fermenterte spekepølsene av villsau passar godt inn der. Lars Erik har stått på Bondens Butikk i Førde og delt ut smaksprøvar. Det har vore veldig populært og vi har hatt ein god omsetjing på pølsene.

Ei lita fin historie frå dagens smaksutdeling:

Ei dame kjem bort og tek i mot smaksprøve, men seier klart i frå at ho må tenke seg litt om. Ho puttar pølsebiten i munnen og tar ein liten piruett på golvet. – No har eg tenkt meg om – eg tar ei pølse! Det er kjekt å komme ut og møte kundane, og vi har fått mange trivelege tilbakemeldingar.

Pølsene i røyken

Vi har redesigna ein konteiner, frå transport i oljebransjen til røykeomn av økologiske spekepølser av villsau. Det fungerar fint med eit lite bål på golvet. Her fyrer vi opp med spon av ulike lauvtre. I dag er kanskje pølsene klare for ein ny tilværelse. Etter at dei er ferdige i røyken blir dei flytta over til ei sjøbu i Rekstavågen, der dei skal henge for tørking og speking i frisk sjøluft.

Pølsestapping Reksta Villsau

Sesongens første pølser i tarm

I dag har vi stappa sesongens første pølser. Den salta kjøtdeiga har lege i vakumposar og melkesyrebakteriane har gjort fermenteringsjobben i 4-5 veker. Den hardaste jobben er å kna opp kjøtet. Lars Erik er sterk i klypa så det er hans jobb 🙂

Anita tar seg av sjølve stappinga i tarmen. Det er alltid spennande å sjå om ein oppnår rett vekt. Målet vårt er at kvar pølse skal vere minst 1000 gram. Denne helga har vi produsert over 200 pølser, som no skal vidare til røyk og tørking. Så ein gong i november er pølseprosessen ferdig. Spennande!

Slakt august 2015

Nedskjering av 40 skrottar

Då har vi levert dei første dyra til slakting – og vi har kjøpt tilbake 40 dyr som skal bli til spekepølse. Vi brukte 2 dagar på å skjære ned skrottane, male dei opp til kjøttdeig, tilsette salt (40 gram salt utan nitrit pr kilo kjøt) og vakumpakke kjøtet. No har vi 360 kilo pølsedeig som skal bli til gode spekepølser framunder jul.

Skinn i stol

Flotte villsauskinn

No har vi fått ein haug med flotte, mjuke og deilige villsauskinn frå garveriet. Då vi sende lam og sauer til slakteriet i haust prøvde vi plukke ut dei flottaste skinna til garving, og vi er godt fornøgde med resultatet.

Her er det innslag av kvitt, grått, brunt og svart – ja noko for ein kvar smak. Vi har tatt bilde av eit lite utval av skinna, som du kan bla deg gjennom her. Kanskje du finn eit som vil passe perfekt i godstolen eller sofaen din?

 

Matchvekt 1000 gram

Pølsestapping

No har den vakuumpakka kjøttdeiga lege til modning i ein månad, og mjelkesyrebakteriane har jobba iherdig. I dag var det tid for å forme kjøtet om til pølser. Dette er skikkeleg handarbeid!

Først må kjøtet knaast godt opp, slik at det blir smidig å jobbe med. Magnhild Dyrdal har tipsa oss om at kjøtet burde ligge temperert siste døgnet før stapping – og det var veldig lurt. Etter knaing var det tid for stapping i pølsestapparen og fylling av tarm. Vi brukar ein tarm som er laga av alginat, og kvar pølse er 50 cm lange.

Målet vårt er at pølsene skal ha ei matchvekt på 1 kg. Så etter at den vanskelige tråden er knytt på pølsene, er det ein tur på vekta. Knyting av tråden på pølsene er faktisk noko av det vanskeligast…. litt irriterande…for det utgjer liksom så lite av pølsa;)

Dagens arbeid resulterte i rundt 120 pølser, som etter planen skal bli knakande god spekemat til 17. mai – HURRA!

Vêrsafari

Vi har flytta vêrane til beite på ei naboøy. Der har dei det fint no i vårvêret, og sauene våre som går lamtunge slepp å bli jaga rundt av lystige og barske vêrar.

Sjølv om sauene våre er av rasen villsau betyr det slettes ikkje at dei er så veldig ville av seg.  Vi ønskjer å ha dei spake, og det fiksar vi med litt kraftfôr i tillegg til mykje tilsyn og kos.

I dag har vi vore på besøk til vêrane som er på «feriekoloni» på Skorpeide. Vi hadde med oss litt godteri (økologisk kraftfôr) – og det var ikkje lenge før dei kom springane og ville smake. Litt kløing bak øyra seier dei heller ikkje nei takk til 🙂

Vi tilset berre salt, 40 g pr kg kjøt

Nye pølser undervegs

Etterspørselen etter dei økologiske spekepølsene har vore overveldande. Så overveldande at vi har sett i gong med ein ny produksjon.

Vi har ikkje fleire sauer å slakte på denne tida av året, så vi tok ei telefonrunde for å høyre om nokon hadde økologisk villsaukjøt til sals. Vi fekk napp på ei naboøy – Færøya – så då var det berre å få klarsignal hos Mattilsynet og setje i gong.

Skrottane var grovparterte og frosne ned i slaktesesongen sist haust. Då var det for oss å ta med kjøtet til foredlingsanlegget på Mo og Øyrane VGS, for nedskjæring, oppmaling, tilsetting av salt og vakuumpakking. Denne gongen fekk vi med junioren, og vi jobba i 12 timar for å få alt klart til fermentering.